හිටපු ධීවර අමාත්ය රාජිත සේනාරත්න මහතා අසනීප තත්ත්වයක සිටින බව පවසමින් අද (02) අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටීමෙන් වැළකී සිටියේය. කිරින්ද ධීවර වරායේ වැලි කැණීමේ ව්යාපෘතියක් රජයේ ප්රසම්පාදන ක්රියාවලීන් උල්ලංඝනය කරමින්, අත්තනෝමතිකව සහ නීති විරෝධීව කොරියානු සමාගමකට ලබා දීමෙන් රජයට පාඩුවක් සිදු කළ බවට ඔහුට චෝදනා එල්ල වී තිබේ.
අල්ලස් කොමිසමේ විශේෂ විමර්ශන ප්රධාන පොලිස් පරීක්ෂකවරයා විසින් ප්රකාශයක් ලබා ගැනීමට අද (02) දිනයේ පැමිණෙන ලෙස රාජිත සේනාරත්න මහතාට ලිඛිතව දැනුම් දී තිබුණි. කෙසේ වෙතත්, අල්ලස් කොමිසම් ආරංචි මාර්ග පැවසුවේ, ඔහුගේ නීතිඥයෙකු අද (02) උදෑසන කොමිෂමට පැමිණ, සේනාරත්න මහතා අසනීප තත්ත්වයක සිටින බැවින් විමර්ශනයට සහභාගී විය නොහැකි බවට ලිපියක් භාර දුන් බවයි.
පසුගිය ජූනි 27 වන දින, කොළඹ ප්රධාන මහෙස්ත්රාත් තනුජා ලක්මාලී ජයතුංග මහත්මිය හමුවේ කරුණු ඉදිරිපත් කරමින් අල්ලස් කොමිසම සඳහන් කළේ, මෙම සිද්ධිය සම්බන්ධයෙන් රාජිත සේනාරත්න මහතා අත්අඩංගුවට ගෙන අධිකරණයට ඉදිරිපත් කිරීමට නියමිත බවයි.
