ජාතික ජන බලවේගයට බලය හිමි බලන්ගොඩ නගර සභාවේ මාසික රැස්වීම ඊයේ (14 වැනිදා) දින නියමයකින් තොරව කල්තැබීමට වැඩබලන සභාපති පේෂල නිකලන්ද තීරණය කර තිබේ.
ඒ මෙම රැස්වීමේදී සමගි ජන බල වේගයේ මන්ත්රි හර්ෂණ හෙට්ටිආරච්චි ඇතුළු විපක්ෂයේ මන්ත්රිවරුන් විසින් යොමු කළ ප්රශ්නවලට පිළිතුරු දීමට යෑමේදී වැඩබලන සභාපතිවරයා සහ විපක්ෂ මන්ත්රිවරුන් අතර ඇති වූ උණුසුම් වචන හුවමාරුවක් හේතුවෙනි. මේ අතර ඇති වූ උණුසුම් තත්ත්වය හේතුවෙන් නගර සභාවේ ලේකම්වරිය සභා රැස්වීමෙන් ඉවත් වූ අතර, කාර්ය මණ්ඩලයද තාවකාලිකව සේවයෙන් ඉවත් විය. එම අවස්ථාවේදී නගර සභාවට විදුලියද විසන්ධි වූ බවද වාර්තා වේ.
මේ පිළිබඳව අදහස් දැක්වූ වැඩබලන සභාපති පේෂල නිකලන්ද පැවසුවේ, සභාව ආරම්භ කළ අවස්ථාවේ සිටම විපක්ෂයේ ඇතැම් මන්ත්රිවරුන් විවිධ තර්ක නගමින් සභාව කරගෙන යෑමට බාධා ඇති කළ බවත්, එම උණුසුම් තත්ත්වය නිසා ලේකම්වරිය සහ සේවක පිරිස ඉවත් වීමෙන් සභාව තවදුරටත් පවත්වාගෙන යෑමට නොහැකි වූ බැවින් දින නියමයකින් තොරව කල් තැබීමට තීරණය කළ බවත්ය.
(අරුණ)
