මන්නාරමේ අදානි සමාගමේ පුනර්ජනනීය බලශක්ති ව්යාපෘතිය ඉදිරියට ගෙන යාමට රජය අපොහොසත් වීම පිළිබඳව කණගාටු වන බව හිටපු ජනාධිපති රනිල් වික්රමසිංහ මහතා පැවසීය.
අදාළ පාර්ශවකරුවන් ඉන්දීය ආයෝජකයින් ඇතුළු ශ්රී ලංකා රජය දැනටමත් එකඟ වී ඇති ව්යාපෘතියක් නැවත සාකච්ඡා කිරීමට මාලිමා ආණ්ඩුව දරන උත්සාහය පිටුපස ඇති තාර්කිකත්වය කුමක් දැයි හිටපු ජනාධිපතිවරයා ප්රශ්න කළේය.
මෙම තත්ත්වය අනාගත මහා පරිමාණ ආයෝජන ව්යාපෘති සඳහා බාධාවක් වනු ඇති බව කී රනිල් වික්රමසිංහ මහතා ඒ ගැන තම කනස්සල්ල පළ කරන බව සඳහන් කළේය.
තම රජය හඳුන්වා දුන් ප්රතිපත්ති ඉදිරියට ගෙන යන ලෙස ආණ්ඩුවෙන් ඉල්ලා සිටින්නේ යැයිද හිටපු ජනාධිපතිවරයා ප්රකාශ කළේය. විද්යුත් නාලිකාවක් සමග සම්මුඛ සාකච්ඡාවකට සහභාගී වෙමින් රනිල් වික්රමසිංහ මහතා මේ බව කීය.
ඉන්දියන් සාගරය කේන්ද්ර කර ගනිමින් ආසියාව දෙසට ගෝලීය බල පෙරළියක් වෙමින් පවතින බව පෙන්වා දුන් හිටපු ජනාධිපතිවරයා ශ්රී ලංකාව එයින් ප්රයෝජන ගැනීමට අපේක්ෂා කළ යුතු බව කීය.
