විදේශිකයින් සඳහා රියදුරු බලපත්ර නිකුත් කිරීමේදී අය කරන ගාස්තු සංශෝධනය කිරීමට රජය පියවර ගෙන තිබේ.
ප්රවාහන, මහාමාර්ග සහ නාගරික සංවර්ධන අමාත්යවරයා ලෙස බිමල් රත්නායක මහතා විසින් ඊට අදාළ ගැසට් නිවේදනය නිකුත් කර ඇත.
ඒ අනුව විදේශ පුරවැසියෙකුට මාසයක කාලසීමාවක් සඳහා තාවකාලික රියදුරු බලපත්රයක් ලබාගැනීමේ දී මෙතෙක් අය කළ රුපියල් 2,000ක මුදල රුපියල් 15,000 දක්වා වැඩි කර තිබේ.
මාසයකට වැඩි සහ මාස දෙකක් දක්වා කාලසීමාව සඳහා රියදුරු බලපත්රයක් ලබාදීමට අය කරන මුදල රුපියල් 21,000ක් වන අතර මාස දෙකකට වැඩි සහ මාස 6ක් දක්වා කාලසීමාවක් සඳහා රියදුරු බලපත්රයක් ලබාදීමට අය කරන මුදල රුපියල් 30,000 කි
මාස 6කට වැඩි සහ මාස 12ක් දක්වා කාලසීමාවක් සඳහා විදේශ පුරවැසියෙකුට තාවකාලික රියදුරු බලපත්රයක් ලබාගැනීමට අය කරන මුදල රුපියල් 45,000ක් වන බව ප්රවාහන, මහමාර්ග සහ නාගරික සංවර්ධන අමාත්යාංශය සඳහන් කළේය.
එමෙන්ම විදේශ පුරවැසියෙකුට රියදුරු බලපත්රයක් අලුත් කිරීම සඳහා අය කරන මුදල රුපියල් 15,000ක් වන අතර රියදුරු බලපත්රය විනාශ වී හෝ හානී වී ඇත්නම් එම රියදුරු බලපත්රයේ අනු පිටපතක් නිකුත් කිරීම සඳහා අයකරනු ලබන ගාස්තුව රුපියල් 15,000කිි.
එමෙන්ම ශ්රී ලංකාවෙන් බැහැරව නිකුත් කරන ලද රියදුරු බලපත්රයක් හෝ ඒ හා සමාන රියදුරු බලපත්රයක් හිමි ශ්රී ලාංකික පුරවැසියෙකුට නව රියදුරු බලපත්රයක් නිකුත් කිරීම සඳහා මෙතෙක් අය කළ රුපියල් 3,300ක මුදල රුපියල් 30,000 දක්වා ඉහළ නංවා තිබේ.
ශ්රී ලංකාවෙන් බැහැරව නිකුත් කරන ලද රියදුරු බලපත්රයක් හෝ ඒ හා සමාන රියදුරු බලපත්රයක් හිමි විදේශිකයෙකු සඳහා නව රියදුරු බලපත්රයක් ලබාදීමට මෙතෙක් අයකළ රුපියල් 15,000ක මුදල රුපියල් 60,000 දක්වා ඉහළ නංවා ඇති බව ප්රවාහන, මහාමාර්ග සහ නාගරික සංවර්ධන අමාත්යාංශය සඳහන් කළේය.
