ශ්රී ලංකාව විසින් ලබා දුන් පොරොන්දු ඉටු වී නොමැති බවත්, යුක්තිය, බලය බෙදීම සහ මානව හිමිකම් පිළිබඳ සෑම කැපවීමක්ම හුදු වචනවලට පමණක් සීමා වී ඇති බවත් මූලික කණ්ඩායම එක්සත් ජාතීන්ගේ මානව හිමිකම් කවුන්සිලයට සිහිපත් කළ බව පාර්ලිමේන්තු මන්ත්රී ශානක්යන් රාසමානික්කම් මහතා පවසයි.
ඒ මහතා සිය ‘X’ ගිණුමේ සටහනක් තබමින් කියා සිටියේ, “දැන් අවශ්ය වන්නේ සහතික නොව ක්රියාමාර්ගයි. ආණ්ඩුවට තමන්ගේ ජනතාව රැවටීමට හැකි සේ ලෝකය දිගින් දිගටම රැවටිය නොහැකියි” යනුවෙනි.
හිටපු මන්ත්රීවරයෙකු වූ එම්.ඒ. සුමන්තිරන් මහතා විසින් පළ කරන ලද ‘X’ පණිවිඩයකට පිළිතුරු දෙමින් මන්ත්රීවරයා මේ බව සඳහන් කළේය. එක්සත් ජාතීන්ගේ මානව හිමිකම් කවුන්සිලය ‘ශ්රී ලංකාවේ ගිණුම්කරණය සහ සංහිඳියාව ප්රවර්ධනය කිරීම’ පිළිබඳ යෝජනාවක් ඡන්දයකින් තොරව සම්මත කර ඇති බව එහි සඳහන් විය.
“2012 වසරේ සිට එවැනි යෝජනා කිහිපයක් තිබියදීත්, වසර 16කට වැඩි කාලයක් තිස්සේ ප්රගතියක් නොමැති වීම ගැන අප කලකිරෙන නමුත්, තවත් වසර දෙකකට ජාත්යන්තර අධීක්ෂණය දීර්ඝ කිරීම අපි පිළිගනිමු,” යනුවෙන් සුමන්තිරන් මහතා පැවසීය.
