2025 යළ කන්නයේ වී අස්වනු මිලදී ගැනීම සඳහා සුළු හා මධ්ය පරිමාණ වී මෝල් හිමියන් සහ සමූපකාර සමිති වෙත සහනදායී පොළී අනුපාතයක් යටතේ ඔඩපණ ණය යෝජනාක්රමයක් ක්රියාත්මක කිරීමට නියමිතව තිබේ.
එය වී ගොවීන් වෙත සාධාරණ මිලක් ලබාදීමේ අරමුණින් සිදු කරන බව මුදල්, ක්රම සම්පාදන සහ ආර්ථික සංවර්ධන අමාත්යංශය නිවේදනය කරයි. ඒ අනුව, මෙම ණය යෝජනා ක්රමයේ ඉලක්කගත කණ්ඩායම් වනුයේ උපරිම දෛනික වී කෙටීමේ ධාරිතාවය මෙට්ට්රික් ටොන් 25කට යටත්වන සුළු හා මධ්ය පරිමාණ වී මෝල් හිමියන් සහ සමූපකාර සමිතිය.
අදාළ රාජ්ය ආයතනයකින් ලබාගත් වලංගු ව්යාපාර ලියාපදිංචි සහතිකයක් හා වී අලෙවි මණ්ඩලය විසින් නිකුත් කරන ලද බලපත්රයක් සියලු ණය ඉල්ලුම්කරුවන් සතුව පැවතිය යුතුය. මෙම ණය යෝජනා ක්රමය යටතේ, ඔවුන්ට 7%ක වාර්ෂික පොළී අනුපාතයකට රුපියල් මිලියන 50ක් දක්වා ණය මුදලක් ලබාගත හැකි අතර අදාළ ණය මුදල දින 180ක් තුළ ගෙවා අවසන් කළ යුතුය.
මෙම ණය යෝජනාක්රමය යටතේ බැංකු හරහා නිදහස් කිරීමට නියමිත මුළු ණය මුදලේ වටිනාකම රුපියල් මිලියන 6,500ක් පමණ වන අතර ගොවීන්ගේ වී අස්වැන්න සඳහා සාධාරණ මිලක් තහවුරු කිරීම සඳහා කෘෂිකර්ම දෙපාර්තමේන්තුව විසින් ප්රකාශයට පත්කරනු ලබන අවම මිලක් යටතේ වී මිලදී ගැනීමට සැලසුම් කර ඇත.
2024 දෙසැම්බර් 30 දින අමාත්ය මණ්ඩලය මඟින් ගනු ලැබූ තීරණයකට අනුව ආරම්භ කෙරෙන මෙම ණයයෝජනා ක්රමය 2025 ජූලි මස 01 දින සිට නොවැම්බර් මස 15 දින දක්වා ක්රියාත්මක කෙරේ.
ඊට අමතරව, පසුගිය 2024/25 මහ කන්නයේදී මෙම ඔඩපණ ණය යෝජනාක්රමය යටතේ රුපියල් මිලියන 6,850ක පමණ ණය අරමුදල් වී මිලදී ගැනීම සඳහා සුළු හා මධ්ය පරිමාණ වී මෝල් හිමියන් සහ සමූපකාර සමිති වෙත ලබාදෙන ලදී.
