වසරක පමණ කාලයක් ඇප නොදී රක්ෂිත බන්ධනාගාරගත කළ හැකි පනතකින් තමන් අත්අඩංගුවට ගැනීමේ සූදානමක් ඇති බව හිටපු අමාත්ය උදය ගම්මන්පිල මහතා සඳහන් කරයි.
එසේ කිරිම හරහා තමන් ආණ්ඩුව සම්බන්ධයෙන් කරන විවේචනයන් වසරක කාලයක් සඳහා නවත්වා ගැනීමට ඔවුන් බලාපොරොත්තු වන බවද හෙතෙම කියා සිටියි.
තම සමාජ ජාල ගිණුම ඔස්සේ වීඩියෝවක් මුදා හරිමින් ඔහු මේ බව සඳහන් කරයි.
ගම්මන්පිල මහතාට එරෙහිව අපරාධ පරීක්ෂණ දෙපාර්තමේන්තුව (CID) විසින් විමර්ශනයක් ආරම්භ කර ඇති බව කොළඹ කොටුව මහේස්ත්රාත් නිලුපුලි ලංකාපුර ට, පසුගියදා දැනුම් දී ඇත..
CID නිලධාරීන් අධිකරණයට ප්රකාශ කළේ, හිටපු අමාත්යවරයා මාධ්ය හමුවකදී කළ ප්රකාශයක් සම්බන්ධයෙන් 2025 අගෝස්තු 12 වැනි දින ලැබුණු පැමිණිල්ලකට අනුව මෙම විමර්ශනය ආරම්භ කළ බවයි
.එම පැමිණිල්ලේ සඳහන් වූයේ, අදාළ මාධ්ය හමුවේදී හිටපු අමාත්යවරයා විවිධ ප්රජාවන් අතර අසමගිය ඇති කළ හැකි ප්රකාශ සිදු කර ඇති බවයි.
මෙම ප්රකාශ ජාත්යන්තර සිවිල් හා දේශපාලන අයිතිවාසිකම් පිළිබඳ සම්මුති පනතේ (ICCPR) 3(1) වගන්තිය හෝ දණ්ඩ නීති සංග්රහයේ 120 වැනි වගන්තිය යටතේ වරදක් වනවාද යන්න තීරණය කිරීම සඳහා මෙම පරීක්ෂණය සිදු කරන බව CID අධිකරණයට දැනුම් දී තිබේ.
