ශ්රී පාදස්ථානයේ හැටන් පිවිසුම් මාර්ගයේ පිහිටි මහගිරිදඹ ප්රදේශයේ භූ අස්ථාවර තත්ත්වය අවම කිරීමට ලබාදී තිබෙන නිර්දේශ ක්රියාත්මක කරනතුරු අදාළ අස්ථාවර කලාපය හරහා පිවිසීම සීමා කළයුතු බව ජාතික ගොඩනැගිලි පර්යේෂණ සංවිධානය රත්නපුර දිස්ත්රික් ලේකම්වරයාට දැනුම් දී ඇත.
මේ අනුව ජාතික ගොඩනැගිලි අදාළ ප්රදේශයේ අවදානම් තත්ත්වය අවම කිරීමට නිර්දේශ හයක් ඉදිරිපත් කර තිබේ.
ඒ අනුව, අස්ථාවරවීම් සිදුව ඇති කොටසේ පවතින පඩි පෙළේ හානියට පත් කොටස කොන්ක්රීට් හෝ ගල් බැම්මක් යොදා සකස් කළයුතු බවත්, එහිදී එහි පාදම මව් පාෂාණයට ලකනක (Dowel) මගින් සම්බන්ධ කළයුතු බව ජාතික ගොඩනැගිලි පර්යේෂණ සංවිධානය විසින් නිර්දේශ කර ඇත.
නායයෑම සිදුවූ කොටසට තවදුරටත් ජලය ගලායාම වැළැක්වීම සඳහා පඩිපෙළේ දෙපසට පිහිටි පැත්තේ පැති බැම්මක් අවම මිලිමීටර් 300ක් පමණ උසකට ඉදිකළයුතු බවද නිර්දේශ කර තිබේ.
අස්ථාවර තත්ත්වයේ ඇති පාෂාණ කොටස්වල පවතින සියලු කුස්තුර සිමෙන්ති මිශ්රණයක් යොදා හොඳින් වසා දැමිය යුතු බවද නිර්දේශ කර ඇත.
ප්රවේශ මාර්ගය හරහා තවදුරටත් සුන්බුන් ගලායාම වැළැක්වීම සඳහා එහි පහළ කලාපයේ පිහිටි මාර්ග කොටසෙහි දකුණු පසටවන්නට මිලිමීටර් 500 ක් පමණ උසැති පැති බැම්මක් ඉදිකළයුතු බවද අදාළ නිර්දේශවල සඳහන්කර ඇත.
නාය යාම ආරම්භ වූ කොටසේ පඩිපෙළට ඉහළින් වියනක් සේ රැඳී ඇති සියලු ශාක කොටස්/පඳුරු/පස් ප්රවේශමෙන් ඉවත් කළයුතු බවද එහි දැක්වේ.
නාය යාම සිදුව ඇති කොටසේ දෙපසේ රැඳී පවතින අස්ථායි පඳුරුද ඉවත් කළ යුතු බව ජාතික ගොඩනැගිලි පර්යේෂණ සංවිධානය විසින් නිර්දේශ කරඇත.
එමෙන්ම, මෙම ස්ථානය රාත්රි කාලයේදී ආලෝකමත්ව තබා ගැනීම සහ භූමියේ ඇතිවන වෙනස්කම් සම්බන්ධව අවධානය යොමු කිරීම අනිවාර්ය බවද ජාතික ගොඩනැගිලි පර්යේෂණ සංවිධානය කියයි.
මෙම නිර්දේශ ක්රියාත්මක කිරීමෙන් පසුව සාමාන්ය පරිදි හැටන් පිවිසුම් මාර්ගය විවෘත කළ හැකි බව අධ්යක්ෂ ජනරාල්වරයා වැඩිදුරටත් සඳහන්කර තිබේ.
මෙම නිර්දේශ ඇතුළත් ලිපියේ පිටපත් ජාතික ගොඩනැගිලි පර්යේෂණ සංවිධානය විසින් ශ්රී පාදස්ථානාධිපති බෙංගමුවේ ධම්මදින්න නාහිමියන්ටද, සබරගමුව පළාත් ආණ්ඩුකාරවරයාටද, නියෝජ්ය ආරක්ෂක ඇමැතිවරයාටද, ආරක්ෂක ලේකම්වරයාටද, යුද හමුදාපතිවරයාටද, පොලිස්පතිවරයාටද, වන සංරක්ෂක ජනරාල්වරයාටද යොමුකර ඇත.
මූලාශ්රය – අරුණ
