උතුරුමැද පළාත් සභාවේ හිටපු මහ ඇමැති එස්.එම්. රංජිත් සමරකෝන්ට සහ ඔහුගේ පෞද්ගලික ලේකම්වරිය ලෙස කටයුතු කළ හිටපු ඇමැති එස්.එම්. චන්ද්රසේනගේ බිරිය වන ශාන්ති චන්ද්රසේන යන දෙදෙනාට මහාධිකරණය විසින් දුන් සිරදඬුවම සම්බන්ධයෙන් ඉදිරිපත් කර ඇති අභියාචනයට යටත්ව කොළඹ මහාධිකරණය ඉදිරියේ ගොනුකර ඇති ඇප ඉල්ලීමට අල්ලස් කොමිසම ඊයේ (16දා) විරුද්ධත්වය ප්රකාශ කළේය.
එම විරෝධතා සම්බන්ධයෙන් ලබන ජූලි 02දා කරුණු ඉදිරිපත් කරන ලෙස විත්තියට දින නියම විය.
කොළඹ ප්රධාන මහාධිකරණ විනිසුරු ආදිත්යය පටබැඳි මහතා විසින් පසුගිය අප්රේල් 02දා එම විත්තිකරුවන්ට බරපතළ වැඩ සහිතව වසර 16ක සිරදඬුවමක් හා අමතරව රුපියල් ලක්ෂ 2 බැගින් දඩ නියම කෙරිණි.
එම තීන්දුව සම්බන්ධයෙන් විත්තියේ නීතිඥයන් පසුගිය මැයි මස 15දා අභියාචනාධිකරණයට අභියාචනයක් ඉදිරිපත් කරනු ලැබීය. අභියාචනයේ තීන්දුවට යටත්ව විත්තිය විසින් ගොනුකළ ඇප ඇයැදුම මහාධිකරණ විනිසුරු ආදිත්ය පටබැඳි මහතා ඉදිරියේ සලකා බැලුණු අවස්ථාවේ අල්ලස් කොමිසම වෙනුවෙන් පෙනී සිටි නීතිඥයන් විරුද්ධව කරුණු දක්වා සිටියේය.
එම කරුණු දැක්වීම සලකා බැලූ කොළඹ ප්රධාන මහාධිකරණ විනිසුරු ආදිත්ය පටබැඳි මහතා ඇප ඉල්ලීම සම්බන්ධයෙන් ලබන ජූලි 02දා විරෝධතා ඉදිරිපත් කරන ලෙස පැමිණිල්ලට දන්වා සිටියේය.
උතුරු මැද පළාතේ ප්රධාන ඇමැතිවරයා ලෙස කටයුතු කළ සමරකෝන් මුදියන්සේලාගේ රංජිත් සමරකෝන් යන අය රජයේ සේවකයෙක් ලෙස කටයුතු කරමින් ඔහුගේ තනතුරට නීත්යනුකූලව හිමිවන ඉන්ධන දීමනාව වැටුප සමඟ ලබා දී තිබිය දී ඉන්ධන දීමනාව ලෙස රුපියල් 26,80,528.10ක මුදලක් 2012- 2014 වසර දෙක සඳහා ලබා ගෙන තිබේ. ඔහුගේ පෞද්ගලික ලේකම්වරිය ලෙස හිටපු ඇමැති එස්.එම්. චන්ද්රසේනගේ බිරිය වන ශාන්ති චන්ද්රසේන කටයුතු කර ඇත. අයුතු ලාභ ලැබීම සඳහා 2 වැනි විත්තිකාරියට අනුබල දීම හා කුමන්ත්රණය කිරීම යන චෝදනා යටතේ කොළඹ මහාධිකරණය දඬුවම් නියම කළේය. ගලෙන්බිඳුණුවැව, කැකිරාව පාරේ පදිංචි කේ. නිමල් විජේතිලක නම් තැනැත්තා සිය පුරවැසි හිමිකම අනුව 2015 වසරේ දී දූෂණ මර්දන කමිටුව මඟින් අල්ලස් කොමිසමට ඉදිරිපත් කළ පැමිණිල්ලක් අනුව මෙම නඩුව ගොනු කිරීම සිදු විය.
