(UTV | ප්රංශය) – වත්මන් ප්රංශ ජනාධිපති එමානුවෙල් මැක්රොන් ජනාධිපතිවරණයේ දෙවැනි වටයේදී ලකුණු 58.55%ක් ලබාගනිමින් යළිත් බලය තහවුරු කර ගැනීමට සමත් වී තිබේ.
මැක්රොන්ගේ ප්රතිවාදියා වූ අන්ත දක්ෂිණාංශික ජාතික පක්ෂයේ නායිකා මැරින් ලෙ පෙන් හට 41.45%ක ඡන්ද ප්රතිශතයක් හිමිවිය.
ප්රංශ ආණ්ඩුක්රම ව්යවස්ථා සභාව අවසන් ප්රතිඵලය සතිය මැදදී සාරාංශ කරනු ඇති බව කියයි. කෙසේ වෙතත්, ලෙ පෙන් දැනටමත් පරාජය පිළිගෙන තිබුනද, ප්රංශ ජාතිකයන් වෙත සිය වගකීම් දිගටම ඉටු කිරීමට පොරොන්දු විය. විශේෂයෙන්ම ලෙ පෙන් පැවසුවේ තම දේශපාලන ව්යාපාරය පාර්ලිමේන්තු මැතිවරණයේදී විශාල සටනක් ආරම්භ කරන බවයි.
ඡන්ද විමසීම දේශීය වේලාවෙන් රාත්රී 8.00ට අවසන් විය. ඡන්දය ප්රකාශ කිරීමේ ප්රතිශතය 73.07% ක් වූ අතර එය ජනාධිපතිවරණයක දෙවැනි වටයක් සඳහා ඉතා අඩු අගයක් ලෙස සැලකේ. 1969 දී පමණක් මෙම අඩු අගය වූයේ 68.9%ක් ලෙසිනි.
ප්රංශයේ ජනාධිපතිවරයා වසර පහකට තේරී පත් වේ. මිලියන 49ක් පමණ පුරවැසියන්ට ඡන්දය ප්රකාශ කිරීමට සහභාගී විය හැකිය. පළමු වටය අප්රේල් 10දා පැවැත්විණි. අපේක්ෂකයින් දොළොස් දෙනෙක් ඊට සහභාගී වූහ.
මැක්රොන් සහ ලෙ පෙන් දෙවැනි වටයට පිවිසියහ. පළමු වටයේ දී මැක්රොන් 27.84%ක ඡන්ද ප්රතිශතයක් ලබා ගත් අතර ලෙ පෙන් වෙත 23.15% ඡන්ද ප්රතිශතයක් හිමිවිය.
