(උදයම්,මෙල්බන්) – බෝම්බයක් ඇති බව පවසා බලහත්කාරයෙන් මැලේසියානු ගුවන්යානයක නියමු කුටියට ඇතුලුවීමට උත්සාහ දැරූ ශ්රී ලාංකිකයෙකු අත්අඩංගුවට ගැනේ.
ඊයේ ඕස්ට්රේලියාවේ මෙල්බන් නුවර සිට ක්වාලාලාම්පුර් නුවර දක්වා ගමන් කරමින් තිබු යානයක් හදිසියේම යළිත් මෙල්බන් ගුවන්තොටුපලට ගොඩබස්වනු ලැබුවේ මගියෙකු කලහකාරී ලෙස හැසිරෙමින් නියමු කුටියට ඇතුලුවීමට උත්සාහ කිරීම හේතුවෙනි.
පසුව එම යානය ගොඩබැස්වා වහාම ඊට දැඩි ආරක්ෂාවක් ලබාදී තිබේ.
මගියෙකු නියමු කුටියට ඇතුලුවීමට උත්සාහ කරන බවට සැලවු වහාම යානය ගොඩබැස්වීමටයි නියමුවා කටයුතු කර ඇත.
අනතුරුව සහායක ගුවන් නියමුවා සහ කාර්ය මණ්ඩලය එක්ව සැකකරු සිය භාරයට ගෙන රඳවාගෙන තිබේ.
ඔහු ප්රකාශකර ඇත්තේ තමන් සතුව බෝම්බයක් ඇති අතර එය පුපුරුවා හරින බවටය.
කෙසේවෙතත් ඔහු සතුව තිබී ඇත්තේ බෝම්බයක් නොව ජංගම දුරකථනවල බැටරිය ආරෝපණයට යොදා ගන්නා (powerbank) එකක් බව පසුව කළ විමර්ශණවලදී හෙළිවී ඇත.
මෙම ලාංකිකයා බීමතින් මෙලෙස කලහකාරීව හැසිරුනු බවට ද විදෙස් මාධ්ය පවසයි.
